Nota da oposición sobre a suspensión hoxe do pleno dos pasos de peóns elevados.

Con sorpresa e cando algún de nós nos estabamos a desprazar dende os nosos postos de traballo á Casa do Concello (sobre ás 11:35 horas) para asistir ao pleno extraordinario solicitado pola oposición sobre a obra de construción dos pasos de peón elevados nas rúas centrais de Pontecesures que se ía celebrar hoxe ás 12 horas, recibimos a nova de que o pleno quedaba suspendido porque o alcalde tivera que saír con urxencia por un tema persoal e que o pleno ía quedar para o xoves 30 de outubro tamén ás 12 horas.

Como o motivo da ausencia foi, ao parecer, un asunto do alcalde nos xulgados xa previsto hai tempo, non se entende como o presidente da corporación convoca un pleno na mesma mañá, dando unha imaxe de desorganización que prexudica a todos (tanto os medios de comunicación como varios veciños que ían asistir á sesión tiveron que dar volta ás 12 horas da Casa do Concello ao enterarse da nova).

Aínda por enriba dos problemas ocasionados aos concelleiros sen exclusiva volvesenos a convocar para as 12 horas do vindeiro xoves en horario de traballo. Deste xeito limitan a asistencia dos comerciantes e dos veciños contrarios á obra dos badenes elevados. O goberno local segue «erre que erre» tomando medidas para impedir o debate e a participación veciñal.

Pero ademais estanse a limitar os dereitos dos concelleiros da oposición pois o pleno extraordinario tiñase que celebrar no prazo de 15 días hábiles dende a súa solicitude que foi o día 11 de outubro. Así, o prazo remata o día 29 e o pleno xa vai ser o 30. Pero parece que da o mesmo e xa nin se respecta a normativa.

En fin, un episodio lamentable máis do goberno local que amosa unha falla de seriedade realmente preocupante.

Juan Manuel Vidal Seage (PP)
Mª Isabel Castro Barreiro (IP)
Luis Ángel Sabariz Rolán (ACP)