Campionato Autonómico Infantil hoxe no Grove, e semifinal mundial para Morison.

Publicado por Redacción en

A padexeira da Náutico Pontecesures foi onte segunda da súa serie na primeira xornada da Copa de Belgrado.

O treito delimitado entre a ponte da Toxa e o espigón de abrigo do porto do Grove serve hoxe de pista do Campionato de Galicia de Infantís Individual. Unha cita co Breogán do Grove coma anfitrión e organizador xunto coa Federación Galega de Piragüismo, e que dirime tamén a trixésimo primeira edición do Trofeo Concello do Grove de Piragüismo. Con 338 padexeiros de 37 clubs inscritos de partida, o 10 % deles coa licra do Náutico Pontecesures (35).

A proba, sobre 3.000 metros, comezará ás 11 coa saída do K-1 Muller Infantil B. Ás 11.30 será a quenda da canoa Infantil B, tanto masculina coma feminina, e as 12 do Home K-1 Infantil B. Os padexeiros infantís A comezarán ás 12.30, coas mulleres kaiakistas, cos canoístas competindo desde as 13 horas, e concluíndo ás 13.30 os kaiakistas masculinos.

No outro extremo de Europa, en Belgrado, a padexeira do Náutico Pontecesures Camila Aldana Morison Rey debutou na terceira Copa do Mundo de Pista da tempada cunha notable actuación na segunda das tres series de clasificación para a final do K-2 500. Coa súa compañeira de selección española Laia Pelachs a arousá empregou 1 minuto, 46 segundos e 320 milésimas. A un mundo, 3,692 segundos, da parella alemana formada por Franziska Weber e por Tina Dietze, que se fixeron coa única praza en xogo para a final de mañá, pero cun segundo de vantaxe sobre as terceiras, as canadianas Natalie Davison e Alanna Bary-Lougheed.

Morison e Pelach pelexan hoxe (15.31 hora serbia) por unha das tres prazas dispoñibles na segunda e última semifinal do K-2 500.

La Voz de Galicia


0 comentarios

Deja una respuesta

Marcador de posición del avatar

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.