Cesáreo Pardal: «Toca sumar esforzos e traballar por un sector turístico máis forte e moderno».

Publicado por Redacción en

Cesáreo Pardal (Padrón, 1969) acaba de ser nomeado presidente do Clúster Turismo de Galicia, un sector que coñece moi ben de primeira man tras case 20 anos ocupando cargos en entidades vinculadas, entre elas a Federación Galega de Turismo Rural (Fegatur). Non importa que Pardal non poida estar nun lugar ou iniciativa turística destacada de Galicia, que el os vai promocionar igualmente co seu apoio nas redes sociais.

-Como afronta a presidencia do Clúster Turismo de Galicia?

-Durante estes primeiros anos de creación e posta en funcionamento do Clúster Turismo de Galicia tiven a oportunidade de traballar man a man co noso presidente, Francisco González, que deixa o listón moi alto. Asumo a tarefa coa responsabilidade de seguir liderando un proxecto que construímos dende cero, no que conseguimos implicar á práctica totalidade do sector turístico galego. Hoxe o clúster está integrado por 64 entidades que representan máis de 7.000 empresas turísticas galegas. Agora toca seguir sumando esforzos e traballo para continuar medrando, acometendo novos proxectos e traballando por un sector turístico máis forte e moderno.

-Que obxectivos se marca?

-Este novo consello executivo que xurdiu tralas últimas eleccións asume a tarefa de darlle continuidade aos proxectos que estamos desenvolvendo, coa formación e a profesionalización do sector turístico como eixes vertebradores das nosas actividades, sen esquecer a promoción e a internacionalización do destino Galicia.

-Como ve o sector?

-Os cambios que se produciron nos últimos anos (crise económica, irrupción das novas tecnoloxías, inestabilidade dalgúns mercados turísticos no Mediterráneo) demostraron que somos un sector clave para a economía. Nos tempos de crise soubemos resistir e agora temos por diante novos retos que debemos afrontar desde a aposta pola calidade e a profesionalidade, traballando como o estamos facendo na diferenciación e na desestacionalización. Quédanos aínda un longo camiño pero xa estamos a ver os primeiros resultados coa mellora de datos de viaxeiros fóra da época estival. Pero quedan moitos retos por afrontar (conectividade, cooperación entre administracións públicas,…) xa que seguimos necesitando traballar conxuntamente como destino turístico fóra das nosas fronteiras para situar a Galicia na cabeza do viaxeiro internacional, ofrecendo un destino multiexperiencial de calidade. E estamos a conseguir un alto nivel de fidelización que nos está permitindo crecer de forma realista e sustentable, de acordo coa nosa capacidade.

-Son tempos de traballar para atraer máis número de turistas ou por aumentar a súa estadía e gasto en Galicia?

-Como antes comentaba, entre os retos está a aposta por un turismo de calidade, que non compita en prezo senón nunha oferta turística diversa e de calidade. É o único camiño para garantir un sector turístico rendible e de futuro.

-A Xunta acaba de crear unha consellería dedicada ao Turismo. ¿Que lle parece?

-Valoramos positivamente a aposta da Xunta polo noso sector, especialmente de cara á celebración dun fito como vai ser o Xacobeo 2021, que vai supor un gran reto para o sector turístico galego. Trala redacción e posta e marcha da Estratexia de Turismo 2020 contamos xa cunha folla de ruta para os vindeiros anos que xa está en marcha e que nos vai permitir cumprir obxectivos. Desde o comezo mantivemos unha excelente cooperación público-privada coa Xunta e estamos convencidos de que continuará dando os seus mellores froitos dende a nova consellería dirixida por Román Rodríguez.

-Seguindo os medios de fóra, ás veces dá a sensación de que Galicia é o Camiño, Santiago e catro lugares máis destacados. Habería que promocionar máis outras zonas da comunidade?

-O Camiño de Santiago é o mellor embaixador de Galicia fóra das nosas fronteiras, especialmente no estranxeiro, e así nolo confirman as estatísticas dos viaxeiros estranxeiros que nos visitan. Moitos descobren o Galicia a través do Camiño, o que lles fai repetir unha e outra vez na elección de destino. E iso é un valor que non debemos perder. Dito iso, evidentemente Galicia é moito máis, temos un gran número de recursos naturais, etnográficos, históricos e paisaxísticos que moitos dos nosos visitantes descobren cando volven a Galicia. Pasa o mesmo con outros recursos turísticos que teñen gran impacto, como as illas Cíes, a Ribeira Sacra ou a praia das Catedrais. É evidente que calquera destino turístico identifícase con tres ou catro puntos de especial interese, son polos de atracción turística, pero o noso traballo está tamén en redireccionar eses fluxos turísticos que chegan para que descubran a contorna.
«Hai que regular o acceso a algúns sitios»

O novo presidente do Clúster Turismo de Galicia é consciente de que hai lugares de Galicia que corren o risco de sobreexpoñerse de máis, entre eles as illas Cíes ou a praia das Catedrais.

-Xa se tomaron medidas por parte da Administración galega e débese seguir facendo en espazos con gran afluencia turística, como pasou este verán coas illas Ons. Neste senso, hai que seguir mellorando a loxística e a planificación destes recursos e, na medida do posible, derivar o exceso do fluxo turístico a outros recursos existentes na contorna.

-Poderíase incluír nese grupo o pórtico da Gloria. Que lle parece o cobro das visitas?

-Coido que o caso do pórtico da Gloria non é o mesmo. Aquí sería falar de descubrir Compostela e a súa contorna cando acudimos a visitar a catedral de Santiago. E a visita a Catedral é de balde, igual que o é a praia das Catedrais ou as illas Cíes (o que se cobra é o transporte, non o acceso). No que estamos de acordo é en que é necesario regular o acceso a puntos especialmente sensibles, evitando a saturación.

-Como ve o seu concello?

-Padrón é a derradeira etapa do Camiño de Santiago na súa variante Camiño Portugués. Os resultados están aí, cun notable incremento no número de peregrinos. Estanse acometendo traballos de mellora, sinalización e aloxamento neste itinerario e Padrón non debe ser alleo a estas melloras. Sen embargo, é preciso facer un maior esforzo na potenciación, comercialización e promoción deste territorio, que non pode ser só zona de paso.

La Voz de Galicia


0 comentarios

Deja una respuesta

Marcador de posición del avatar

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.