O xeodestino Mar de Santiago acode á feira Fitur co aval de ter rexistradas 13.000 visitas.

A presentación da marca turística será o día 20 no stand de Galicia

Amedida que se van aproximando as datas da Feira Internacional de Turismo (Fitur) que se celebra a vindeira semana en Madrid, sucédense as informacións sobre a axenda que van desenvolver os concellos neste foro. O xeodestino turístico Mar de Santiago, do que forman parte os concellos de Vilanova, Catoira, Valga e Pontecesures, tamén terá o seu oco.

O venres, día 20, no stand de Galicia en Fitur terá lugar o acto de presentación, que se centrará en promocionar os recursos culturais, históricos, paisaxísticos e gastronómicos dos territorios que forman parte da marca, e sempre tendo como eixo principal a Traslatio, a ruta marítimo-fluvial que recrea o traslado dos restos do apóstolo a Santiago.

A delegación de Mar de Santiago aproveitará a súa presenza en Fitur para participar en varias xuntanzas de traballo con turoperadores e representantes de empresas e entidades vencelladas ao sector, co obxectivo de seguir reforzando o posicionamento da marca no mercado turístico, segundo informan desde o Concello de Valga.

Desde a posta en marcha deste proxecto, a estación marítima de Mar de Santiago ten rexistrado preto de 13.000 visitas, a marca tense presentado a máis de cen turoperadores e creáronse e comercializáronse máis de vinte paquetes turísticos, segundo informan as mesmas fontes.

O traballo realizado cristalizou o pasado ano coa posta en marcha da excursión Mar de Santiago, con saída todos os xoves do verán. De cara á vindeira campaña, xa se traballa en novas accións turísticas e culturais que presentarán en Fitur co obxectivo de seguir atraendo visitantes.

La Voz de Galicia