ACTIVIDADES FORMATIVAS PARA PERSOAS ADULTAS CURSO 2013/2014 EN PONTECESURES

Educación Secundaria para persoas Adultas -ESA

  • Clases presenciais de preparación para a obtención do título oficial ESO.
  • Preparación para as probas libres de maio e setembro.

Infórmase que está aberto o prazo de inscrición para as actividades formativas para adultos, consistentes en clases presenciais de preparación para a obtención do título oficial de Educación Secundaria para persoas Adultas ??ESA- ao que poden incorporarse todas aquelas persoas, maiores de 18 anos, que queiran concorrer ás probas oficiais para obter o título de Graduado en Secundaria, Curso 2013/2014, e tamén as clases de preparación para as probas libres de maio e setembro (que permiten obter a ESO nun único exame tipo test).

As clases realízanse en horario de tarde-noite.

Para máis información poden dirixirse á AULA de Educación de Persoas Adultas no CPI INFESTA (R/ Avelino Pousa Antelo, s/n), de luns a xoves de 19 a 21 horas, ou no Servizo Social Comunitario deste concello os luns, martes e venres de 9 a 13.30 horas.

O Fondo Galego de Cooperación e Solidariedade destina 10.000 Euros a Filipinas a través de Acnur e abre unha conta de emerxencia.

logo fondo galego de cooperacion

 

 

A asociación de concellos e deputacións apoia á poboación a través da axencia da ONU para as persoas refuxiadas e recadará fondos para a reconstrución

O Fondo Galego de Cooperación e Solidariedade (do que forma parte o Concello de Pontecesures) vén de doar 10.000 euros ao Alto Comisionado das Nacións Unidas para os Refuxiados (Acnur) para axudar a poboación afectada polo tifón Haiyán en Filipinas. A axencia das Nacións Unidas está prestando asistencia humanitaria en terreo ás e aos superviventes do devastador ciclón que o 9 de novembro arrasou a rexión central do país.

A Asemblea de socios do Fondo Galego, integrado por 90 concellos e dúas deputacións, resolveu ademais poñer a disposición a súa conta de emerxencia para esta causa. Cos fondos recadados financiaranse proxectos de reconstrución na zona unha vez superada a situación de emerxencia e cando, previsiblemente, a desatención informativa agrave a vulnerabilidade das vítimas. As persoas e entidades que desexen realizar a súa achega poden facelo no número de conta 2091 0209 10 3040019000 de Novagalicia Banco, indicando ??Emerxencia Filipinas?.

Os datos oficiais cifran nunhas 4.000 as persoas falecidas por mor do supertifón, aínda que segundo outras fontes poderían chegar a 10.000. A Oficina das Nacións Unidas para a Coordinación de Asuntos Humanitarios estima que 13 millóns de persoas se están vendo afectadas polo tifón Haiyan e que máis de catro millóns foron desprazadas. Perante esta situación, o Fondo Galego vén de manifestar a través dun comunicado as súas accións e o desexo do municipalismo galego de que ??a emerxencia humanitaria que agora comeza exprese o mellor do sistema internacional de cooperación para fuxir de grandes erros presentes noutras recentes catástrofes humanitarias, primando a atención ás vítimas?.

O texto prosegue indicando que ??as consecuencias deste desastre natural obrígannos necesariamente a reflexionar sobre a necesaria posta en valor do Obxectivo do Milenio nº7: Garantir a sustentabilidade ambiental, facendo un chamado a Estados e empresas a respectar os acordos internacionais que formulan a consecución desta meta?. Neste senso, o Fondo Galego de Cooperación e Solidariedade está a financiar dous proxectos de senllas ONGD galegas a prol da prevención de riscos fronte aos desastres naturais en Cuba e El Salvador.

O Fondo Galego

O Fondo Galego de Cooperación e Solidariedade está integrado por 90 Concellos e as Deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido 142 proxectos en 25 países e promove numerosas actividades e materiais en relación aos desequilibrios Norte-Sur.

Os 3 grupos do equipo de goberno de Pontecesures presentan moción de reprobación e piden a dimisión de Luís Sabariz

Con data do 19 de novembro de 2013 tivo entrada no rexistro xeral do Concello de Pontecesures a seguinte moción:

MOCI?N CONXUNTA DOS GRUPOS B.N.G., P.S.O.E. E TEGA DO CONCELLO DE PONTECESURES SOBRE A REPROBACI?N DO CONCELLEIRO ELECTO DE A.C.P. DON LUÍS ÁNGEL SABARIZ ROLÁN

EXPOSICI?N DE MOTIVOS

Con data 26 de xuño de 1999 no apartado 5.1 do pleno extraordinario noméase como 1º Tenente de Alcalde a Don Luís Ángel Sabariz Rolán e no apartado 5.2 delégaselle ao 1º Tenente de Alcalde a Concellería de Obras, Urbanismo e Servizos.

Con data 14 de outubro de 2000 Don Luís Angel Sabariz Rolán presenta en calidade de promotor unha solicitude de obra maior para a construción de ??Edificio de Viviendas? na finca ubicada no Camiño de San Xulián nº 37 que é informada favorablemente tanto polo arquitecto municipal con data 19 de decembro de 2000, como pola comisión informativa de Obras con data 06 de febreiro de 2001.

Con data 6 de febreiro de 2001 a Comisión de Goberno adopta o seguinte acordo:

??Autorizar a D. Luís Ángel Sabariz Rolán, para construción de edificio destinado a vivendas na finca sita no Camiño de San Xulián nº 37, de conformidade co proxecto redactado polo Arquitecto Dona Luisa García Gil e visado polo Colexio Oficial de Arquitectos de Galicia con data 13/04/2000? onde figura a ??Clasificación Urbanística do Solo: Urbano, Ordenanza 1 Edificación Intensiva? e entre outros requerimentos se lle expresa claramente a obligatoriedade de solicitar a ??licenza de 1ª ocupación? unha vez rematadas as obras.

Cabe constatar que nese momento concedíanse as licenzas en base ás ??normas subsidiarias do ano 1991? nas que claramente pon que hai dous tipos de vivenda:

Categoría 1ª: Vivenda unifamiliar.

Categoría 2ª: Vivenda plurifamiliar.

E segundo as normas subsidiarias do 1991 a unha calificación do solo como Urbano, Ordenanza 1 Intensiva, lle corresponde unha categoría de vivenda 2ª, ou sexa, vivenda plurifamiliar.

Nesta lexislatura, A Concellería de Obras estivo consultando os expedientes das obras de vivendas plurifamiliares xa rematadas que non solicitaran no seu día a licenza de 1ª ocupación, atopando ??con gran sorpresa? que a única vivenda plurifamiliar rematada que non solicitou no seu día a licenza de 1ª ocupación é o promotor Don Luís Ángel Sabariz Rolán, actual concelleiro electo por A.C.P. e casualmente Concelleiro de Obras, Urbanismo e Servizos na época na que se pide a licenza da obra.

Por iste motivo, con data 4 de febreiro de 2013, o Alcalde requírelle ó Sr. Sabariz que solicite a correspondente licenza de 1ª ocupación nun prazo de 10 días hábiles como tamén concédeselle audiencia co mesmo prazo para que faga as alegacións que estime oportunas.

Con data 6  de febreiro de 2013, o Sr. Sabariz presenta a seguinte alegación:

??Que en relación co escrito recibido no día de onte con nº de saida 157/2013 desexo manifestar que a edificación leva rematada máis de sete anos e xa non procede esixir a solicitude de licenza de 1ª ocupación. Xúntase certificación acreditativa?, polo que solicita: ??que sexa incorporada a presente, aos efectos oportunos, ao expediente en cuestión?.

Vista a alegación do Sr Sabariz, o técnico municipal fai un informe técnico coas seguintes conclusións:

??A obra para a que o interesado conta con licenza concedida con data 06.02.2001 se atopa rematada, de acordo co certificado asinado pola directora a obra, con data 29.11.2005.?

Non constan no expediente datos para constatar se a edificación se axusta á prevista na licenza concedida. Porén, toda vez que xa transcorreron máis de 6 anos desde a finalización das obras, aínda que non se axustase á licenza, non procede incoar expediente de reposición da legalidade urbanística, de acordo co establecido no artigo 210 da LOUGA.

No mesmo sentido, e polo mesmo motivo, tampouco procede incoar expediente de reposición da legalidade nin expediente sancionador por terse realizado a primeira utilización da edificación sen tramitar a preceptiva licenza de primeira ocupación.?

Os feitos indican que o promotor da obra, como concelleiro de urbanismo, era coñecedor que nesa parcela non podía facer unha vivenda unifamiliar e empregou a estratexia de pedir a construción dun ??Edificio de vivendas? e non solicitou a 1ª ocupación xa que de facelo demostraríase que fixo unha vivenda unifamiliar e non un edificio de vivendas.

Visto todo isto, enfróntamonos a unha infracción urbanística ó entrar a vivir sen a correspondente licenza de 1ª ocupación, e que si urbanísticamente non se pode actuar contra ela é porque xa prescribiu. Agora ben,  as responsabilidades políticas non prescriben, e o que si queda claro que a día de hoxe o Sr. Sabariz usou o seu cargo político para cometer unha infracción urbanística, atopándose a súa casa en situación ilegal e fora de ordenación.

As infraccións poden prescribir pero sempre serán infraccións.

Un concelleiro debe servir á cidadanía, e non servirse do seu cargo en beneficio propio. E agora observamos como o Sr. Sabariz, ??o gran valedor da legalidade en materia urbanística no Concello de Pontecesures?, aproveitou o exercicio das súas funcións municipais para beneficiarse persoalmente.

Feitos como os descritos, sáltanse todas as normas da ética política e o respeto á legalidade á hora de desempeñar a labor de concelleiro, en tanto antepoñen os intereses urbanísticos particulares ós do ben común, polo que consideramos que é indigno de ostentar o cargo que ocupa.

Consideramos absolutamente grave e inadmisible que un edil de urbanismo, que durante a súa traxectoria política se sirva do seu cargo para privilexiarse no trámite das obras na súa propia casa.

Un representante público non pode actuar coa prepotencia e o desprezo cara á veciñanza, esixíndolle o estrito cumprimento da normativa urbanística, e ter o cinismo de esixir ós demais o que él non cumpre.

Vostede non pode exercer de voceiro de nada cando está dando o peor dos exemplos.

Por todo o anteriormente exposto solicitamos:

1)      Que sexa reprobada a actitude do Concelleiro da A.C.P. Don Luís Ángel Sabariz Rolán por esta Corporación.

2)      Pedirlle ó Sr Sabariz que por dignidade ética e política dimita e entregue a súa acta de Concelleiro.

Pontecesures, 14 de novembro de 2013.

 Portavoz  B.N.G. Pontecesures

Portavoz  P.S.O.E. de Pontecesures

Portavoz TEGA