Deportes

A Liga Provincial de Pontevedra «O Noso Club 2026» afronta este domingo, en Pontecesures, unha última xornada decisiva: só 30 puntos separen ao líder do quinto clasificado, o que garante un final moi apertado.

O Club Náutico Pontecesures mantén o liderato con 280 puntos, pero O Muíño de Ribadumia pérsegueo con 255. Portonovo é terceiro con 254, o Club de Mar Ría de Aldán-Gandón ocupa a cuarta praza con 252, e o Club As Torres-Romería Vikinga ascende á quinta posición con 250 puntos.

Estes datos son o resultado da quinta e penúltima xornada, disputada con 384 deportistas de 18 equipos nas categorías prebenxamín, benxamín, alevín e infantil, con percorridos de 1.500 metros. O Club As Torres-Romería Vikinga, que acudirá a Pontecesures con opcións de pelexar polas prazas de privilexio, sumou 7.786 puntos na xornada, superando ao Náutico Pontecesures (7.491) e ao Muíño de Ribadumia (6.442).

A clasificación por equipos rematou con Portonovo en cuarta posición (6.087 puntos) e a Escola de Piragüismo Cidade de Pontevedra en quinta (4.387).

Entre os resultados individuais destacan as vitorias de Mark Cabaleiro (CMDC Breogán do Grove) en prebenxamín K1 masculino, Isaura Tobío (As Torres) en prebenxamín feminino, Roi Torres (Mar de O Grove) en benxamín B masculino, Mariña Freijeiro (Náutico de Cobres) en benxamín B feminino, e Gabriel Fuentes (Escuela de Piragüismo Cidade de Pontevedra) en alevín A K1 masculino.

Todo apunta a que a última xornada, que se celebrará nas augas do río Ulla en Pontecesures, será unha auténtica final de campionato.

Fonte: Faro de Vigo

A palista cesurense Nerea Novo logrou a vitoria na proba de C1 5.000 metros sénior no III Selectivo Nacional, celebrado no embalse de Trasona. O seu brillante resultado dálle a praza para representar a España no Campionato do Mundo de Sprint de piragüismo.

A cita mundialista celebrarase do 26 ao 30 de agosto en Poznań (Polonia), pendente da publicación da convocatoria oficial e da confirmación por parte da Real Federación Española de Piragüismo.

A clasificación de Novo adquire un valor especial pola exigencia do selectivo e por tratarse dunha distancia que esixe resistencia, capacidade táctica e regularidade durante todo o percorrido. A palista respondeu con autoridade no momento decisivo, convertendo en vitoria o traballo acumulado ao longo da tempada.

Dende o Náutico Pontecesures expresaron a súa satisfacción: «Nós sentímonos inmensamente orgullosos deste novo logro», e desexáronlle «a maior das sortes» nunha cita na que tentará confirmar o seu excelente estado de forma.

Fonte: Faro de Vigo

O Club Náutico Pontecesures volveu exercer de referencia na Liga Provincial de Pontevedra «O Noso Club 2026». A cuarta xornada, disputada no encoro de Verducido, confirmou o dominio do conxunto cesurense, que logrou a súa cuarta vitoria consecutiva e reforzou o liderato con 7.895 puntos.

O Náutico O Muíño de Ribadumia firmou unha notable segunda posición, con 7.069 puntos, por diante do Portonovo.

A regata reuniu pola mañá ás categorías máis pequenas sobre 1.500 metros e reservou para a tarde as probas infantís, xa sobre 3.000 metros.

Pontecesures completou o seu dominio con triunfos de Xiana Fabeiro, Andrea López, Aaron Mosteiro, Sara Cascallar, Marta Ordóñez, Izan Santos e Narah Cancela. Entre os clubs arousanos tamén brillou o CMDC Breogán do Grove, grazas ao triunfo de Mark Cabaleiro en prebenxamín K1.

Fonte: Faro de Vigo