Web non oficial de Pontecesures

Xosé LOIS LADRA Pregoeiro da Festa da Lamprea de Cesures

O seu traballo A pesca fluvial tradicional en Galicia. Caneiros, pescos e pesquerías gañou o último Premio Vicente Risco de Ciencias Sociais e en Pontecesures pensaron que quen mellor ca el para pregoar as marabillas da «princesa do Ulla».
-¿Probaría a lamprea non?
-Tiven o pracer de degustala en varias ocasións. O certo é que ten un sabor moi peculiar, diferente e sorprendente para quen a proba por vez primeira. Gústame bastante, especialmente guisada á bordelesa. Por desgraza aínda non comín empanada de lamprea, algo polo que teño curiosidade.
-¿�? tan fero como semella?
-Xa di o refrán que «A lamprea ten a boca fea», aínda que a min non me anoxa en absoluto o seu feitío. Trátase dun auténtico fósil vivinte e o certo é que os galegos temos unha moi longa tradición na pesca e na degustación de lampreas. Coido que a lamprea nen é tan fea nen tan fera como a pintan. O que acontece é que para moita xente é unha grande descoñecida, e, xa se sabe, non se pode amar aquilo que se descoñece.
-¿Como ve o futuro desta pesca?
-O futuro da pesca da lamprea en Galicia é algo moi difícil de vaticinar. A maioría dos pescadores din case sempre que cada ano hai menos capturas, pero eu penso que isto é cuestión de ciclos, con boas e malas tempadas. A polución dos ríos, os encoros, as minicentrais e o cambio climático están a incidir negativamente sobre esta e outras moitas especies migratorias. Coido que se deben adoptar medidas medioambientais destinadas a garantir o futuro da lamprea nos ríos.

LA VOZ DE GALICIA, 03/04/08