Queridos veciños e veciñas:
Estamos ás portas dunha nova cita electoral, unha cita particularmente importante, porque nesta ocasión elixiremos aos representantes municipais que se van encargar de encamiñar os destinos de Pontecesures a as súas xentes durante os vindeiros catro anos.
Pontecesures necesita dos seus veciños máis que nunca, necesita un goberno firme, apegado á realidade do noso pobo e con capacidade para xestionar ante calquera institución proxectos encamiñados á mellora das infraestruturas, das súas manifestacións culturais, e, en definitiva, defender os intereses dos seus homes e mulleres.
Cómpre poñer fin a este delirio de goberno que durante os últimos catro anos non soubo resolver axeitadamente todas as expectativas que os veciños depositaron neles. Un goberno inoperante, falto de ideas, con un alcalde desaparecido e cunha pobre xestión, adicado máis ben á procura da mellora das condicións laborais e económicas dos tres titulares con dedicación exclusiva. Foi a primeira vez na nosa historia que a maioría do equipo de goberno cobra por desenvolver ese labor, por resolver problemas que ao final desta lexislatura seguen sen solución.
O vindeiro 24 de maio, os cesureños temos a posiblidade de valorar ao goberno que nos dirixiu durante estes catro anos, a ese tripartito de conveniencia, sopesar se efectivamente cumpriron o que se esperaba deles, e se os recursos públicos que se dedicaron a manter ao anterior equipo de goberno resultaron rendibles ou se, pola contra, foron catro anos perdidos e un despilfarro de recursos a cambio de nada. Non teño dúbida do que pensará a maioría.
A candidatura coa que o Partido Popular de Pontecesures concorre a estas eleccións está formada por mulleres e homes convencidos de que outro Pontecesures é posible, e que o primeiro paso para obter resultados distintos é non facer sempre as mesmas cousas nin cometer os mesmos erros.
En ti, veciña e veciño de Pontecesures, confío para obter o voso apoio neste vindeiro 24 de maio, convencido como estou de que outro Pontecesures é posible coa colaboración de todos.
Aproveito a ocasión para trasladarche un afectuoso saúdo.
Juan Manuel Vidal Seage
Candidato do Partido Popular á alcaldía de Pontecesures
