Cando á tempada de piragüismo lle quedan xa só dous telediarios, a Federación Galega de Piragüismo vén de facer públicas as clasificacións finais da maioría das copas galegas que se disputaron ao longo do presente ano. E unha campaña máis, o As Torres-Romaría Vikinga figura coma referente entre os equipos do Baixo Ulla e do Salnés a nivel de resultados colectivos.
Así, logo de selar a pasada fin de semana o subcampionato da Liga Nacional de Jóvenes Promesas en augas de Castelldefls, Barcelona, o club catoirense pode presumir xa oficialmente do título de gañador da Copa Galega de Promoción, e do segundo posto no podio da Copa Galega de Pista.
Na primeira competición, completada o pasado 28 de agosto coa celebración do Campionato Galego de Promoción en Verducido, As Torres, con 420 puntos, aventaxou con claridadade o seu inmediato perseguidor, o Náutico Firrete (404), gañando seis das sete regatas puntuables. Todas, agás a penúltima, o 8 de agosto en Ferrol. O Náutico Pontecesures, que alternou a partes iguais segundos e terceiros postos nas probas da Copa, completou o podio a tan só 2 puntos do Firrete, realzando deste xeito o traballo de formación realizado no Baixo Ulla.
O Breogán foi sexto, con 380 puntos, mentres que o Piragüismo A Illa rozou o top ten con 357, a só dous do Ría de Aldán.
A pista, a modalidade raíña do piragüismo polo seu peso no programa olímpico, tivo unha vez máis no Kayak Tudense o seu gran dominador, co As Torres-Romaría Vikinga segundo a 10 puntos do campión da Copa Galega. Neste caso o conxunto catoirense tivo que sufrir o dominio case absoluto do Tudense, gañador de sete das oito probas do calendario. Incluído o Campinato de España Sénior e Xuvenil da derradeira fin de semana de agosto. Media ducia de segundos postos, un terceiro e un sexto foron a bagaxe das Torres ao longo da tempada.
Entre os dez mellores clubs de pista a nivel autonómico figuran este ano tamén o Breogán do Grove, quinto con 328 puntos, e o Piragüismo A Illa, noveno con 304. O Náutico O Muíño (293 puntos) quedou decimoterceiro a 9 puntos do décimo, o Piragüismo Vilaboa.
A falta de pechar a Copa Galega de Ríos, o piragüismo arousán disfruta de catro podios por equipos a nivel autonómico, ao sumárselles aos das Torres e ao do Náutico Pontecesures o subcampionato do Piragüismo Cambados na Copa Galega de Kaiak de Mar. O equipo da vila do albariño rematou a media ducia de regatas puntuables con 242 puntos, tan só por detrás do Confraría de Pescadores Portonovo, con 250.
Na Copa Galega de Veteráns o Breogán foi o mellor dos representantes arousáns, sexto na clasificación xeral con 190 puntos nas catro probas calendadas.
LA VOZ DE GALICIA. 08/09/10