O Fondo Galego de Cooperación e Solidariedade presenta en Pontecesures un conto para crear conciencia solidaria.

‘Antía, Wamba e o regato pequeno’ é a proposta ideada pola compañía A Tropa de Trapo para o Fondo Galego de Cooperación e Solidariedade.
O espectáculo está  baseado en historias con música en directo e dirixido a un público familiar

A xira do novo espectáculo de contacontos deseñado pola compañía A Tropa de Trapo para o Fondo Galego de Cooperación e Solidariedade chega o sábado 29 a Pontecesures. Grazas ao apoio do Concello, socio da entidade municipalista, o Centro Social acollerá a representación de ‘Antía, Wamba e o regato pequeno’, a partir das 20.30 horas.

Marta Ortiz e Brais das Hortas volven apostar polas historias con música en directo, desta volta dirixidas a un público infantil e familiar, sen límite de aforo. A obra está protagonizada por Antía, unha nena galega, e Wamba, un mozo do Congo que se busca a vida vendendo de todo na rúa. Os contos del e as merendas dela fundiranse nunha amizade que lle aprenderá a Antía que compartir non é dar o que che sobra e que, como din na tribo de Wamba, o río énchese con regatos pequenos.

‘Antía, Wamba e o regato pequeno’ tómalle o relevo aos ‘Contos coas mas abertas’, que desde 2010 percorreron un total de 61 escenarios de 48 Administracións socias do Fondo Galego, colleitando unha excelente acollida.