Demanda o PP que se aclaren os números desa viaxe, excesiva semella en todos os sentidos, da conselleira Bugallo á Feira do Libro da Habana. Fóra do maior ou menor éxito, réditos e prestixio que a cultura galega poida obter de tal expedición, eu, que me sinto ideolóxicamente dentro do nacionalismo (non do BNG), que me preocupan e ocupan as cousas da terra, pregúntome non só polos números, senón tamén polos nomes. Que alguén me diga quen foron os 200 ocupantes do avión que despegou de Santiago en dirección á Habana.
Argumento con frecuencia que carecemos os galegos dun corpo sólido de intelectuais que nos represente con dignidade. Dentro e fóra. Vivo coa sensación de que habitamos un país onde esta intelectualidade, salvo honrosas excepcións, son xente do montón, sen ningún xenio artístico, ás veces mesmo mediocres. Custiónense cantos artistas, pensadores… coñecen que merezan esa consideración en serio.
Son dos que opinan, como Franco Grande, dialéctica esgotada hai semanas, que queda moi atrás a calidade na creación, que a literatura actual é infinitamente inferior á dos nosos clásicos (¿como non comparar?).
De aí que, entroncado co primeiro dos argumentos desta carta, apelo a quen poida dicirme os nomes e apelidos desa xente que viaxa en representación miña, gastos pagos. Algúns salientounos a prensa (Freixanes, escritor de tres excelentes novelas; Rivas, novelista, xornalista, poeta; Barreiro, presidente da RAG; Villares…nada que obxectar). ¿Os 196 restantes?. Lin nomes de músicos sobrevalorados, outros que non son nada nin foron ata chegar o bipartito. Unha chea encontraron acubillo na política de substitución de Juan Pardo por afectos ao partido, sen ningunha ou pouca calidade musical, gloria parecen dos cargos na Consellería, con méritos descoñecidos que non superarían unha análise medianamente rigorosa. Prefiro calar.
Conselleira, dea conta do que fixo, en quen gastou os fondos de cultura, esquilmados en boa parte no Gaiás, e custiónese con seriedade toda esa pléiade de supostos creadores que se enchufaron por obra súa. Listaxe inmensa polo visto.
Números e nomes, Bugallo. ¿Pasearon polo Malecón? ¿Bañáronse nas praias do leste? ¿Quen? ¿Que?.
Carta ó Director de LA VOZ DE GALICIA de X. Rei (O Grove) 23/02/08
