Espazos públicos de 19 aldeas de Valga locen mellor imaxe cunha competición veciñal.

O Concello aportou os materiais para as tarefas de acondicionamento

As tres actuacións máis valoradas recibirán premios de 300, 200 e 100 euros

Melloras realizadas nas inmediacións da casa veciñal de Vilarello.

O concurso Embelecer Valga ten xa gañadores, aínda que estes non se farán públicos ata o vindeiro sábado, no acto de entrega de premios da XXXIII Festa da Anguía e Mostra da Caña do País. O xurado xa emitiu a súa votación despois de percorrer os parques, espazos e infraestruturas públicas participantes que locen estes días a súa mellor imaxe.

Este certame premia ao lugar máis fermoso acondicionado e engalanado polos veciños e é convocado anualmente polo Concello co obxectivo de implicar á cidadanía no coidado dos lugares públicos, acometendo proxectos de mellora e accións de limpeza, mellora, dotación de equipamentos ou ornamentación. O Concello aporta os materiais necesarios para a realización das obras.A anguía de Valga vólvese internacionalMarcos Manteiga Outeiro

Instalación do Miradoiro da Perdiz, en Vilar.

Dezanove lugares das distintas parroquias participaron nesta edición do concurso e o pasado sábado foi o día no que recibiron a visita do tribunal, formado por un representante de cada comisión veciñal participante e os concelleiros de Cultura, Turismo e Facenda. Valoraron aspectos coma o deseño de xardíns e zonas recreativas, a orixinalidade e creatividade da decoración, o aproveitamento de recursos da zona e uso de materiais de refugallo.

As actuacións levadas a cabo foron as seguintes:

• En Balleas, acondicionamento do parque.
• En Barcia, mantemento do parque.
• En Barro, melloras no local social e mantemento do parque
• En Beiro, mantemento do parque e do lavadoiro.
• En Campaña, mantemento da contorna da igrexa.
• En Canle, acondicionamento do parque.
• En Carballiño, adecentamento do parque do Quinteiro.
• No CEIP Baño-Xanza, remodelación da biblioteca e melloras no patio.
• No Centro Ocupacional de Discapacidade, actuacións de mellora nos espazos exteriores do centro.
• No Colexio Rural Agrupado de Valga (que recentemente foi elixido pola Fundación Princesa de Girona como un dos 23 centros rurais de referencia en España para acoller a estudantes en prácticas), arranxo de espazos exteriores das escolas.
• En Eiras, melloras no lavadoiro.
• Na Escola Infantil Municipal, melloras no patio exterior.
• En Ferreirós, acondicionamento de talude na estrada PO-190 e melloras no parque.
• En A Medela, acondicionamento de fonte e lavadoiro e da súa contorna.
• En Raxoi, melloras no lavadoiro e nos arredores deste elemento patrimonial.
• En Reguengo, melloras no lavadoiro do lugar.
• En Vilar, traballos de mantemento e acondicionamento no parque, no Campo Labeiro e no Miradoiro da Perdiz.
• E en Vilarello, mantemento da casa veciñal e da súa contorna, do parque e dos lavadoiros da aldea.

El Correo Gallego