Manipulación na nota do alcalde sobre o Canon da Auga para que a suba da taxa municipal se confunda coa suba do canon.

O pasado día 24 de outubro a ACP solicitou ao goberno local que divulgase información sobre o novo Canon da Auga, que entrou en vigor o 1 de xullo, sobre todo para que as vivendas onde vivan máis de tes veciños tramitasen a solicitude para beneficiarse de maiores volumes de auga nos tramos máis económicos.

Case un mes despois da petición e cando moitos veciños demandaban información pois esta cuestión comentase na rúa dende hai tempo, quedamos sorprendidos ao coñecer o escrito enviado polo alcalde aos veciños pois ademáis das explicacións do novo canon sinálase polo presidente da corporación «que ten interese en que os veciños vexan que a variación que experiementa o recibo non é consecuencia de ningún incremento nin nova taxa aplicada polo Concello de Pontecesures», cando isto non é certo porque ademais da suba polo canon, hai outra suba que o alcalde non cita que é a suba da taxa da auga aprobada inicialmente polo pleno cos votos do goberno local o día 19 de novembro. Nova taxa municipal non hai, obviamente, pero suba da vixente, por suposto.

O data do escrito do alcalde é a do 21 de novembro dous días despois da aprobación da suba e, intencionadamente, informa do canon da Xunta pero non dos novos prezos da auga fixados polo concello. Sempre botándolle a culpa aos demais de todo dicindo que os que suben as cotas son as outras administracións. Das subas do concello, caladiño.

Quere o alcalde que cando no primeiro trimestre de 2013 veñan os novos prezos nos recibos da auga coas subas a culpa a leve unicamente a Xunta e que iso cale entre a veciñanza. Por enriba, distribúese a nota sesgada por correo a cada vivenda e o gasto de franquicia da carta cúbrese con cartos do concello que pagamos todos.

Pois os veciños teñen que saber as tarifas actuais e as que van rexer en 2013:

Ata o de agora as cotas son as seguintes:

Usos domésticos
Mínimo 10 m3/mes, a 0,174294 euros cada m3.
Excesos a 0.198334 euros cada m3 que exceda do mínimo.

Usos comerciais
Mínimo 20 m3/mes, a 0,180304 euros cada m3.
Excesos a 0,2103554 euros cada m3 que exceda do mínimo.

Usos industriais.
Mínimo 40 m3/mes, a 0,210354 euros cada m3.
Excesos a 0,228385 euros cada m3 que exceda do mínimo.

Usos especiais: Obras
Mínimo 60 m3/mes, a 0,210354 euros cada m3.
Excesos a 0,240405 cada m3 que exceda do mínimo.

Dereitos de conexión á rede.
Usos domésticos 90,15 euros.
Usos comerciais e industriais 120,20 euros.

Acordouse a modificación da ordenanza fiscal con entrada en vigor das novas cotas para 2013. No novo cadro de tarifas considérase uso doméstico o consumo para dito fin; os usos asimilados aos domésticos comprenden consumos que nas tarifas anteriores sinalábanse como de uso comercial, uso industrial (con consumo inferior a 2000 m3 ano) e uso para obras, e uso non doméstico comprende os consumos superiores a 2.000 m3/ano.

A táboa de tarifas acordada é a seguinte:

Doméstica.
Cota fixa 2,15 euros/mes
Consumo, ata 30 m3 por trimestre. 0 euros.
Máis de 30 m3/trimestre. A 0,25 euros por cada m3 de exceso.
Dereitos de acometida 125 euros

Asimilados a domésticos.
Cota fixa 5,80 euros/mes.
Consumo, ata 30 m3 por trimestre. 0,25 euros/m3 por cada un deses primeiros 30 m3
Máis de 31 m3/trimestre a 0,29 euros por m3.
Dereitos de acometida 155 euros.

Non Domésticos (Volume).
Cota fixa 10 euros/mes.
Consumo, a 0,28 euros por cada m3 consumido.

Isto é o que non explica o alcalde no escrito. Por suposto cando se traten as reclamacións presentadas contra a aprobación inicial no pleno debatiremos estes temas.

Luis Ángel Sabariz Rolán
Concelleiro da ACP Pontecesures