Renfe desmantela servizos.

Como usuaria, levo moitos anos aturando a nefasta política de servizos que Renfe presta e considero un grave insulto a publicidade que a empresa fai nos medios de comunicación : véndennos fume. Agora, informada dos novos horarios para a liña Vigo-A Coruña e traxectos menores, quixera expresar a miña indignación ante a evidencia do desmantelamento dos servizos ferroviarios.

Trátase duns horarios que desvirtúan a realidade: fan crer que se amplían os horarios cando en realidade deixan sen tren a milleiros de persoas que o empregan nos seus desprazamentos, e como mostra, o caso da última modificación de horarios que recentemente entrou en vigor.

Unha hora máis terán que agardar os usuarios que antes collían o tren Vigo-Santiago que partía ás 21,40 horas e que agora sae ás 22,30. Tratábase dun tren moi servizal que contaba con moita afluencia de pasaxeiros, pois conicidía co horario de peche dos comercios, negocios e academias. A esas horas da noite nas que nada apetece máis que chegar á casa, ninguén pode permitirse o luxo de agardar a demora de 50 minutos que agora Renfe impón.

Esta escura manobra equivale a suprimir a actual liña. De luns a venres fará só o traxecto ata Vilagarcía, xa non ata Santiago coma antes. Suprimen de todo a liña os sábados. � de sentido común que muden os horarios daquelas liñas que carecen de usuarios para ver de captar máis, pero vai contra tódalas normas de márketing público a modificación dunha liña tan demandada e que xa conta con público fixo.

Estas ilóxicas modificacións obrigarán a que moitos destes usuarios se decidan polo emprego do vehículo privado nos seus desprazamentos a Vigo. O tren é unha alternativa á praga de accidentes nas estradas que estamos a vivir, amais dun medio máis ecolóxico que o coche. Temos que tomar conciencia deste grave asunto e potenciar o tren de cercanías como medio alternativo, para ben da sociedade.

Carta ó director de LA VOZ DE GALICIA de Elsa Quintas Alborés (Redondela)